|
 غسان جان كير
قبل كل شي عاوزكم تترحموا على راجل كان بيقول ( الدين افيون الشعوب اذا استغل ) . وانا برضو بقولكم ان الدين مش بس افيون , ده كمان زيّ الحشيش بيفتّح النخاشيش , وبيبقى دوا مجاني للحرافيش , ومايفكروش برغيف العيش , وده طبعا اذا استغل برضو , وعاوزكم يا حبايبي ما تنسوش ال ( اذا ) دي ابداً لانها لو اتحذفت حتجيبلكوا وجع الراس , عشان في ناس حيفتكروك كافر ويبعتولك كام واحد بلطجي ويوضبوك عل آخر .
ولو عاوزين تعرفوا ازّاي ال ( اذا ) دي بتعمل كل المصايب دي , حقولكوا بس بشرط واحد مافيش غيرو , وهو انكم ما تتريقوش عليا وتقولوا الراجل ده بيخرف . لما سِيدنا الشيخ بيشتغل في الدين , حنقول ونبرر : هي شُغلانه بيربي بها عيالو , ولو انها مش شُغلانة مظبوطة ان الواحد ما بيبعش غير كلام , لكن ( اذا ) اشتغل سِيدنا الشيخ في السياسة كمان , ده يا عيني يبقى استغلال , لان الدين والسياسة عمرهم ما اجتمعوا الا والدين تحت باط السياسة , خصوصي في الامصار دي , يعني ازاي بيطالب سِيدنا الشيخ من الغلابة والمستضعفين ان يصبروا على المرمطة اللي هم فيها , ويعشّمهم بالجنة , وفي الوقت نفسو بيدعو بطول العمر للسلطان , وده طبعا بدل ما يفكّرو بالآية الكريمة اللي بتقول { والذين يكنزون المال والفضة ولا ينفقونها في سبيل الله * فبشرهم بعذاب أليم } , وازاي حيفسرلو الآية , وان المفرض على السلطان ان يوزع الفلوس المتلتلة على قلبو على الغلابة , ده طبعا غير المتخبية بالبنوك بتوع (الكفار) . و ( اذا ) ما قدرش يقول التفسير الصحيح اللي بيرضي ربنا , حيعمل ايه ؟! طبعا حيشممنا الهيرويين , ويسمعنا كام حديث , مانعرفش انو موضوع ولا صحيح , وياخدنا للجنة ويفرّجْنا على حور العين , وان الواحد مننا قادر على افتضاض مية وحدة باليوم , واكتر من كده , ان البتاع بيبقى منتصب لمية سنة مش بيكل وبتاعها مش بيمل .
ولما سِيدنا الشيخ عاوز يرجعنا , دايما , ألف وربعومية سنة لورا , وان الواحد مننا لازمن ياكل تمرتين قبل فطور رمضان , وبعدها يطفح ما بدالو من الفول والطعمية , في الوقت اللي بيفطر هو والسلطان بتاعو المحمّر والمشمّر والكباب والكفتة والذي منو , مش ده برضو اللي بيسموه تخدير ولا ايه . ولما سيدنا الشيخ عاوز يضربنا حقنة مورفين , بيعمل ايه ؟! بيقوم يخوفنا من نار جهنم , وان الوحد مننا ما يصحش يبول وهو واقف على رجليه , لان السيدة ( عائشة ) قالت اذا حد قالكوم ان الرسول كان بيبول وهو واقف , ماتصدقوهوش . ولما سيدنا الشيخ بيشتغل في الدعاية والاعلان , وعاوزنا نطلع لبرا ونتفسح , ونشتري حاجات من برا , وهوا عارف ان معندناش الا القضا , وده بدل ما يشجع على السياحة الداخلية , والمنتوجات الوطنية ؟!.
يوووووووه .... دنا نسيت الحدوتة المصرية خالص , لا مؤاخذة ,اصلو انا بحب الشعب المصري أوي أوي أوي , عشان هو شعب عندو خفة دم . مش زي سيدنا الشخ اللي مابيضحكش للرغيف السُخن . بس عاوز افكركُم يا حبايببي , ان كُل الكلام ده مش من عندي , وانما من كتب التراث . طبعا انتو عارفين ياحبابيبي ان الغزوات والفتوحات كان لها هدفين , الاول : ان الأمم التانية تدخل في الاسلام , والهدف التاني : اذا ما غيروش دينهم الاولاني حيدفعوا الجزية بالصرماية القديمة . بيقولولك يا سيدي ان كان في طائفة من الأكراد زرجنت معاهم ومفهموش الدين الجديد وما رضيوش يدخلوا فيه , وراسهم وألف سيف ان مايدفعوش الجزية , قام الخليفة ( عمر ) عمل ايه ؟ . طبعا حيعمل زي ما بيعمل كل مرة , ويبعتلهُم جيش جرار , ويكسّر الدنيا فوق دماغهم , طبعا الجيش ده انتصر لان ربنا والملايكة ديما معاه , اما الاكراد , فاللي مات مات واللي هرب هرب , والنسوان والصبايا صاروا سبايا لأفراد الجيش , وده برضو هدف اساسي للغزوات , بدليل ان في احد الغزوات كان في راجل عجوز و متختخ شايل السيف وعاوز يحارب , فقالولوا مفيش لازم تحارب معانا , فرد عليهم وقال : أمال احصل على جارية ازاي ؟!. نرجع للحدوتة بتاعتنا , بيقولولك يا سيدي ان الجيش لم استولى على الفلوس والصيغة والتحف , بعتوا قسم منّها للخليفة ( عمر ) بحجة ان لازمو مصاريف كتيرة , لكن ( عمر ) المرة دي ما رضيش ياخد ولا مليم , وأمر ان الحاجات دي لازم ترجع لأصحابها الجُداد , يعني افراد الجيش , قاموا افراد الجيش عملوا ايه ؟. طبعا حيبيعوها , لكن المصيبة فين ؟! المصيبة ان نتيجة الخراب والدمار , ان التُحفة اللي كانت بتسوى عشرين ألف درهم ؛ ما تباعتش غير بخمس دراهم !!!!!!! بقى يقدر سيدنا الشيخ يقول لنا مين هم الارهبيين ؟!!!!!!!!!!!!!!!!.
هذا البريد محمى من المتطفلين , تحتاج إلى تشغيل الجافا سكريبت لمشاهدته
|
